විශම භාග | The Other Half | 5% to SL Charity

මම එක වසරෙ ඉන්නකොට මම වැඩ කළේ ගොඩාක් හිමින්. ඒක පන්තිභාර ටීචර් ව පිස්සු වැටිලා යකා නටන්න තරම් දුරට ගියා. එතකොට මගේ කන මිරිකලා, ඔලුවට ටොකු ඇනලා මැටි මෝලා කියලත් කියනවා. මම ඒ වචනෙ ඉගෙන ගත්තෙත් එයාගෙන්. එයා කොච්චර කිව්වත් මට ඉක්මනින් වැඩ කරනවා කියන එක තේරුණේම නෑ.

Source

ඉතින් විශම භාග බලනකොට මගේ එක වසරෙ ටීචර්ව මට මතක් වුණා. මගහැරගන්න හොඳ නැති විශිෂ්ඨ නිර්මාණයක කුතුහලය විනාස කරන්න බැරි හින්දා කතාව නොකියා මම පුංචි දේවල් ටිකක් විතරක් මේ ගැන ලියලා තියන්නම්.

Source

රුවන්සිරිගෙයි කමලසිරි ගෙයි මහා ගහක් වගේ සීයෙ,, ඔයා මගේ හිත තෙත් කළා. වැහැරිලා දිරලා ගිය ශරීරයක් ඇතුළෙ කවදාවත් නොදිරපු මානව දයාව ඉස්සරහා මම කොයිතරම් පුංචි ද කියලා ඔයා තේරුම් කළා. මානව දයාවෙන්,කරුණාවෙන් පිරුණු රූස්ස ගස් වගේ මිනිස්සුන්ගෙ සෙවණෙ හැදෙන පුංචි පැළ කොයිතරම් සුවඳ ද කියලා ඔයා පෙන්නලා දුන්නා.

Source

ලස්සනට සිංදු කියන්න පුලුවන් ඒත් ගණන් බැරි නිසා ගණන් ගුරුතුමාගෙන් ඇස් වලට කඳුලු එන තරම් තැලෙන රුවන්සිරි, එයා මගේ හිත එකපාරම ආදරෙනුයි දුකෙනුයි තෙත් කළා. රුවන්සිරිගෙ පුංචිම පුංචි ඇඟ ඇතුලෙ තියෙන ලොකු හිත එයාගෙ ගණන් පුලුවන් නිවුන් සහෝදරය කමලසිරිගෙ හිතට වඩා ලොකුයි කියලා මට හිතුණා.
ඒ මොනව වුණත් දෙන්නගෙ සහෝදර ප්‍රේමය ගැඹුරින්ම දැනුණා.

Source

රුවන්සිරිගෙයි කමලසිරිගෙයි ඉස්කෝලෙ සංගීත ටීචර් ගැන තව ටිකක් ලොකු වුණාම රුවන්සිරි රචනාවක් ලියන්න වුණත් පුලුවන්. අහසෙ සුරංගනාවියො ඉන්නවා කියලා මම අහලා තිබුණට මගේ සුරංගනාවි හිටියෙ සංගීත කාමරේ ඇතුලෙ කියලා එයා ඒක පටන් ගන්නත් පුලුවන්.

Source

බඩගින්නෙන්, දුප්පත්කමින්, තව දාහක් විතර දේවල් වලින් බැට කන ලංකාවෙ පොඩි වුන්ගෙ අහස තමන්ට දැනෙන පාටින් පාට කරන්න නොදී, ගුරුවරයට, දෙමව්පියන්ට ඕනෙ පාටින් පාට කරන්න හදන එක වරදක් නෙමෙයි අපරාධයක්. ඒ අහසෙ නිදහසේ ඉගිලෙන්නෙ තියෙන තටු වලට පාඩුවේ ඉගිලෙන්න ඉඩ හරින්න. විශම භාග තුළින් කියන්න හදන එකම පණිවිඩේ ඒක නෙමෙයි. ඒත් හැම දරුවෙක්ගෙම පරිමාව එක වුණාට ධාරිතාව වෙනස් කියලා තේරුම් ගන්න කියලා ලෝකෙන් කරන ඉල්ලීම මේ ලෝකෙ පැවැත්ම පවා තීරණය කරන පණිවිඩයක්.