කෙල්ලෙක් නම් අයියෙක් ඉන්න ඕන | 5% for SL Charity

මං මේ කියන්න යන්නේ, මට මගේම අයියෙක් නොමැති වීමේ සහ අයියෙක් ලැබීමේ කතාව. මේ කතාව කෙල්ලන්ට සහ අයියලාට.

ඔයා කෙල්ලෙක් නම් ජීවිතේ කවදකම හරි කොයිම මොහොතක හරි මේ වෙලාවෙ අයියා හිටියනම්, එහෙමත් නැත්නම් මේ වෙලාවේ මට අයියෙක් හිටියනම් මෙහෙම වෙන්නෙ නෑ නේද කියලා හිතිලා ඇති. මං මේ කියන්නේ අක්කලා, නංගිලා, මල්ලිලා හොඳ නෑ කියලා නෙමෙයි. ඒත් අපිට අයියා කෙනෙක් හිටියනම් කියලා හිතෙන අවස්තා නැතුව නෙමෙයි.

ඔයාට අයියා කෙනෙක් ඉන්නවා කියන්නෙ ඔයා වාසනවන්තයි? ඉන්න අයනම් කියාවි, අපෝ මහ වදකාරයෙක් කියලා 😂. අයියා කෙනෙක් නැති උන්ට තමයි ඒ අගේ දැනෙන්නේ.

මට ඉන්නවා, මගේ වයසම නෑදෑ සහෝදරයො දෙන්නෙක්. සරලවම කිව්වොත් මේ තමයි දන්න කාලේ ඉදලා මගේ අයියලා දෙන්නා. කොටින්ම ඒ දෙන්නා මගේ... වෙන කාගෙවත් නෙමෙයි. අපි පුංචි කාලේ ගොඩක් හැදුනෙ වැඩුනෙ එකටම නිසා මට අයියලා නැති අඩුවක් දැනුනෙම නැති තරම්.

ඒත් කාලයත් එක්ක අපිත් ටික ටික වයසින් වැඩෙනකොට, අපිට ඉස්කෝල තුනකට යන්න උනාම, අපි අපේම මාර්ග වල ගමන් කරන්න උනාම, ඉස්සර වගෙ එකතු වෙන්න වෙලාව අඩු වෙන්න පටන් ගත්තා.

මේ වගේ කාලෙට, ඕන තරම් මටත් අයියා කෙනෙක් හිටියානම් කියලා හිතිලා ඇති. මගේ හොඳම යාලුවාට අයියලා දෙන්නෙක්ම ඉද්දි, එයාලාගෙ ආදරේ දකිද්දි, මටත් අයිය කෙනෙක් ඕන කියලා අනන්තවත් හිතිලා ඇති.

නැති අයියල කොහෙන් මවන්නද දෙයියනේ... මං ඉතිං හැම වෙලාවෙම, අවුලක් නෑ මට ඔය ඉන්න අක්කා ඇති කියලා හිතා ගන්නවා. කොහොමෙන් කොහොම හරි කාලේ ගෙවිලා ගිහින්, මෙන්න මටත් අයියෙක් ලැබුනා... හෑහ්... එහෙමත් වෙන්න පුලුවන්ද? 😄😄😄

අර මට හිටියම ඇති කියලා හිතාගෙන හිටිය අක්කා... අයියෙක් හොයා ගත්තා නෙහ්...

හැම මස්සිනා කෙනෙක්ටම අයියා කෙනෙක් වෙන්න බැරි උනත්, මට ලැබුන මස්සිනා, අයියෙක් වීම හරිම සතුටක්. තමන්ගෙ නංගි වගේම මාවත් එයාගෙම නංගි කරගැනීම සතුටක්. අයියෙක් නැති මට අයියෙක් උනාට ස්තුති 💖.

කියන්න, ඔයාලටත් කවද හරි අයියෙක් හිටියානම් කියලා හිතිලා තියෙනවද?